(Saturday , 23 November,2024)
NepalNewsLine
२२ साउन, काठमाडौँ - प्रमुख प्रतिपक्ष दल नेकपा एमालेका कारण प्रतिनिधि सभामा उत्पन्न गतिरोध अन्त्य गर्न मंगलबार बिहान पुनः छलफल हुने भएको छ ।
प्रधानमन्त्रीको सरकारी निवास बालुवाटारमा बिहान साढे १० बजे सभामुख देवराज घिमिरे सहित प्रधानमन्त्री, सत्तापक्ष दलका नेता, प्रमुख प्रतिपक्षी दलका नेताहरुबीच छलफल हुने भएको हो ।
सोमबार दुई चरणमा भएको छलफलबाट सहमति ननिस्किएपछि भोलि बिहान पुनः बैठक बस्ने तय भएको छ ।
सुन तस्करीको विषयमा प्रमुख प्रतिपक्षी दल नेकपा एमालेले उच्चस्तरीय छानबिन समिति बनाउने विषयमा लिएको अडान र सत्तापक्षले पनि सो छानबिन समिति आवश्यक नभएको भन्दै लिएको अडानका कारण आज बसेका २ वटा बैठकबाट सहमति निस्कन सकेन ।
प्रतिनिधिसभाको बैठक बस्न नसक्दा कानुन निर्माणको काममा ढिलाई हुनुका साथै जनसरोकारका विषय संसदमा उठ्न पाएको छैन ।
यसैबीच राष्ट्रिय स्वतन्त्र पार्टीका संसदीय दलका नेता रवि लामिछानेले प्रतिनिधिसभालाई बन्धक बनाएर प्रमुख प्रतिपक्षी दलले बार्गेनिङको माध्यम बनाएको बताएका छन् ।
२ पटक समय निर्धारण भएर पनि प्रतिनिधिसभा बैठक बस्न नसकेपछि सामाजिक सञ्जालमार्फत उनले आक्रोस पोखेका छन् ।
उनले भनेका छन्– ‘वर्षौदेखि देशलाई कसरी प्यारलाईज्ड् गरिएको रहेछ भन्ने राम्ररी बुझ्दैछौं । कयौं कानुन बनाउनुपर्ने छ, कयौं कानुनमा संशोधन छन्, जन सरोकारका कयौं मुद्दामा छलफल र निर्णय गर्नुछ ।
तर संसद चल्दैन, बार्गेनिङ चल्छ, मात्र बार्गेनिङ । दुःखद ।।’
प्रतिक्रिया