(Thursday , 21 November,2024)
Anonymous
२० भदौ, काठमाडौं । भुटानमा जारी साफ यू-१६ च्याम्पियनसिप अन्तर्गत समूह ए को अन्तिम खेलमा नेपाल भारतसँग १-० ले पराजित भएको छ । जित्नैपर्ने खेलमा पराजित भएपछि नेपाल प्रतियोगिताबाट बाहिरिएको छ ।
साविक उपविजेता समेत रहेको नेपाल लगातार दुई खेलमा हार बेहोर्दै समूह चरणबाटै बाहिरिएको हो । यसअघि पहिलो खेलमा पनि नेपाल बंगलादेशसँग १-० ले नै पराजित भएको थियो ।
चाङलिमिथाङ स्टेडियममा बुधबार भएको खेलमा भारतका लागि मोहम्मद अर्सादले ३३औं मिनेटमा गोल गर्दै अग्रता दिलाएका थिए । त्यसपछि नेपालले बराबरी गोल फर्काउने प्रयास गरे पनि सफल हुन सकेन । भारतले पहिलो हाफमा लिएको अग्रता जोगाउँदै खेल जितेको हो ।
दोस्रो हाफमा भारतले नेपालमाथि लगातार दबाब बनाएको थियो । भारतको दुई प्रहार बारमा लागेर फर्केको थियो । ६ मिनेटको इन्जुरी टाइममा नेपालले पनि गोल फर्काउने राम्रो अवसर पाएको थियो तर सदुपयोग गर्न सकेन ।
दुई खेलमा दुई गोल बेहोरेको नेपालले एक गोल पनि गर्न सकेन ।
लगातार दुई खेल जित्दै भारत ससमूह ए को विजेताको रुपमा सेमिफाइनल प्रवेश गरेको छ । भारतसँग नेपाल पराजित भएपछि एक जित र एक हारको नतिजा निकालेको बंगलादेश समूह उपविजेता बन्दै सेमिफाइनल पुगेको छ ।
समूह बी बाट पाकिस्तान यसअघि नै लगातार दुई खेल जित्दै सेमिफाइनल पुगिसकेको छ । अब भुटान र माल्दिभ्सबीच हुने खेलबाट सेमिफाइनल पुग्ने अन्तिम टोलीको टुङ्गो लाग्नेछ ।
प्रतिक्रिया