(Saturday , 11 May,2024)
NepalNewsLine
१० असार, काठमाडौं - हप्ताको पहिलो दिन शेयर बजार उच्च अंकले बढेर हरियाली भएको छ ।
शेयर बजार परिसूचक नेप्से आइतबार ६२.२१ अंकले बढेर दुई हजार एक सय १७ दशमलव ७३ विन्दुमा पुगेको छ ।
आइतबार नेप्से गएको फागुन १० गते यताकै उच्च विन्दुमा पुगेको हो ।
फागुन १० गते नेप्से २१ सय २१ विन्दुमा थियो । आज सबै समूहको शेयर बढदा बीमा, उत्पादन, व्यापार र फाइनान्स समूहको शेयर उच्च अङ्कले उकालो लाग्यो ।
आइतबार कारोबार रकम पनि झन्डै पाँच महिनायताकै उच्च भएको छ । आइतबार दुई सय ७५ वटा कम्पनीका एक करोड ४७ लाख कित्ता शेयर छ अर्ब ४९ करोड चार लाख रुपैयाँमा कारोबार भएका छन् ।
गएको पुसको २६ गतेपछि ६ अर्ब रुपैयाँभन्दा धेरैको कारोबार भएको थिएन । आइतबार सबैभन्दा धेरै शिवम् सिमेन्टको ४९ करोड ९० लाख र सोल्टी होटलको ३८ करोड ९० लाख रुपैयाँको शेयर किनबेच भयो ।
आइतबार सबैभन्दा धेरै लाइफ इन्सुरेन्स कर्पोरेशन, हिमालयन लाइफ इन्सुरेन्स, साम्लिङ पावर कम्पनी, बीपीडब्ल्यू लघुवित्त, सिटी होटल, शिवम् सिमेन्ट र एनएमबी ५० म्युचुअल फन्डको शेयर १० प्रतिशतले बढेको छ ।
समग्रमा बजार हरियाली भएको दिन आज सबैभन्दा धेरै शुभम पावर कम्पनीको शेयर झन्डै सात प्रतिशतले घटेको छ ।
प्रतिक्रिया