(Monday , 25 November,2024)
Anonymous
काठमाडौँ । सभामुख देवराज घिमिरेले प्रतिनिधि सभाको अवरोध हटाउन प्रधानमन्त्री पुष्पकमल दाहाल ‘प्रचण्ड’सँग छलफल गरेका छन् । प्रधानमन्त्रीसँगको छलफलमा सभामुख घिमिरेले बजेट पारित गर्न समयको चाप रहेको स्मरण गराउँदै विपक्षी दलसँग संवाद गर्न आग्रह गरेका हुन् ।
आइतबार प्रतिनिधि सभा अवरोध भए लगत्तै सभामुखले प्रधानमन्त्रीसँग टेलिफोन संवाद गरेर सभामुख घिमिरेको सचिवालयले जनाएको छ । ‘प्रधानमन्त्रीको भारत भ्रमणका कारण चार दिन व्यतीत भइसकेको छ, अझै सदनमा अवरोध हुने हो भने बजेट पारित गर्न समय अभाव हुन्छ,’ प्रधानमन्त्रीलाई सभामुखले भनेका छन्, ‘समयमा नै संवादबाट निकास खोजौँ, अब सदन अवरोध भइरहन सक्दैन ।’
सभामुखसँगको संवादमा अध्यक्ष दाहालले सदनमा विपक्षीले उठाएको मागबारे आफू जानकार रहेको भन्दै सोमबारको संसद्मा आफूले प्रस्टीकरण दिने बताएका छन् । ‘म एमाले अध्यक्ष केपी शर्मा ओली सहित विपक्षी दलसँग पनि कुरा गर्छु, सरकारका तर्फबाट लचकता र पहल हुन्छ,’ प्रधानमन्त्रीले सभामुखलाई विश्वस्त तुल्याएका छन् ।
सभामुखले एमाले प्रमुख सचेतक पदम गिरी, रास्वपा प्रमुख सचेतक सन्तोष परियार र राप्रपा प्रमुख सचेतक ज्ञानबहादुर शाही मार्फत विपक्षी दलहरूलाई बजेट पारित गर्ने समयसीमा बुझिदिन आग्रह गरेका छन् ।
यसैबीच एमाले प्रमुख सचेतक पदम गिरीले अहिलेसम्म सदन सुचारु गर्ने विषयमा प्रधानमन्त्री प्रचण्डले कुनै आफूहरूसँग कुनै छलफल नगरेको बताएका छन् ।
‘सभामुखले आफ्नो तर्फबाट पहल गरिरहनुभएको छ । तर सोमबार बिहानसम्मको अवस्थामा कुनै प्रगति भएको छैन’, प्रमुख सचेतक गिरीले रातोपाटीसँग भने,‘यो विषयमा प्रधानमन्त्रीले विपक्षी दलका नेतालाई बोलाएर कुराकानी गर्दा प्रभावकारी हुन्थ्यो तर उहाँले त्यसो गरेको देखिँदैन ।’
उनले नागरिकता विधेयक प्रमाणीकरण गर्न कार्यपालिकाले राष्ट्रपतिलाई पत्र लेख्ने कुरा असंवैधानिक भन्दै विधायिकामाथिको अतिक्रमण गरेकाले राजनीतिक विषयसमेत जोडिएको बताए ।
‘यसकारण यो विषयमा प्रधानमन्त्रीले सदनलाई जवाफ दिनुपर्यो । अर्को फूलबारी बन्दरगाह प्राप्त गर्ने नाममा हाम्रो भूमि नै भारतलाई दिन्छौ भन्ने खालको अभिव्यक्तिप्रति माफी माग्नुपर्छ । यी दुवै काम नगरेसम्म एक इन्च पनि अघि बढ्दैन,’ गिरीको भनाइ छ ।
प्रतिक्रिया