(Friday , 10 May,2024)
Anonymous
काठमाडौं । विभागीय टोली नेपाल पुलिस क्लबलाई हराउदै आयोजक किंग्स क्लब काठमाडौं दोस्रो संस्करणको किंग्स कप पुरुष भलिबल प्रतियोगिताको च्याम्पियन बनेको छ ।
काठमाडौंको नयाँ बसपार्कस्थित ढोरपाटन स्पोर्ट्स क्लबको कोर्टमा सोमबार भएको फाइनलमा पुलिसलाई ३–१ को सेटमा पराजित गर्दै उपाधि जित्न सफल भएको हो ।
किंग्सले पहिलो सेट आफ्नो नाममा गर्दा दोस्रो सेट गुमाएको थियो । त्यसपछिको दुवै सेट जित्दै आयोजक टिम च्याम्पियन बनेको हो ।
किंग्सले पहिलो सेट २५–२३ ले जित्दा दोस्रो सेट १८–२५ ले गुमाउन पुग्यो । त्यसपछिको दुवै सेट किंग्सले २५–१७ र २५–२३ ले जित्न सफल भयो ।
शनिबार नै तय भएको फाइनल वर्षाका कारण सोमबार मात्रै हुन सफल भयो ।
च्याम्पियन किंग्सले नगद २ लाख २ हजारसँगै कप, मेडल र प्रमाणपत्र प्राप्त गरेको छ ।
दोस्रो भएको पुलिसले १ लाख १ हजार रुपैयाँ, कप मेडल र प्रमाणपत्र हात पारेको छ ।
संयुक्त रुपमा तेस्रो भएको नेपाल एपिएफ क्लब र गण्डकी प्रदेशले ७२ हजार ७ सय रुपैया, कप र प्रमाणपत्र पाएको छ ।
विजयी टोलीलाई नेपाल भलिबल संघका अध्यक्ष जितेन्द्र बहादुर चन्द, आयोजक किंग्स क्लबका अध्यक्ष अञ्चल शाही लगायतले पुरस्कृत गरे ।
२३ साउनबाट सुरु भएको प्रतियोगितामा ८ टोलीको सहभागिता रहेको छ ।
प्रतिक्रिया