(Friday , 10 May,2024)
NepalNewsLine
सर्लाही । सर्लाहीको हरिपुुर्वा नगरपालिका र चन्द्रनगर गाउँपालिकाका शिक्षक तलव नपाएपछि धर्नामा बसेका छन् ।
विगत ५ महिनादेखि तलब नपाएपछि शिक्षकले विद्यालय बन्द गरेर गाउँपालिका तथा नगरपालिका कार्यालयमा एक सातादेखि धर्ना जारी राखेका छन् ।
चन्द्रनगरका शिक्षकले गाउँपालिकाभित्रका २२ वटा सामुदायिक विद्यालय बन्द गरेर धर्ना सुरु गरेका हुन् । विद्यालय बन्द हुँदा चन्द्रनगरमा ६ हजार र हरिपूर्वामा १६ वटा सामुदायिक विद्यालयका ५ हजार विद्यार्थी अध्ययनबाट वञ्चित भएका छन् ।
हरिपूर्वामा नगरसभा नहुँदा र चन्द्रनगरमा गाउँसभा नहुँदा शिक्षक, कर्मचारीले गएको साउनदेखि तलब पाएका छैनन् । सामाजिक सुरक्षा भत्ता पनि रोकिएको छ ।
नेपाल शिक्षक महासंघ चन्द्रनगरका अध्यक्ष सरोज सिंहले पाँच–पाँच महिनासम्म तलब नपाउँदा समस्या भएको बताउनुभयो । तलब उपलब्ध गराउन लिखित तथा मौखिक रुपमा ध्यानाकर्षण गराउने, कालोपट्टी बाँधेर पठनपाठन गराउने जस्ता अन्य दबाबमूलक कार्यक्रम भइरहेको उहाँले बताउनुभयो ।
बजेट निकासा नभएर बालबालिकालाई दिवा खाजा खुवाउन नपाउँदा धेरै विद्यार्थी अनुपस्थित हुन थालेको र विद्यालयमा मसलन्द लगायत सामग्री सकिएको सिंहले बताउनुभयो ।
ऋण, सापटी लिएर खर्च टार्दै आएपनि तलब आउने छाँट नदेखिएपछि उधारो र ऋणका कारण मुख देखाएर हिँड्न पनि गाह्रो परेको आन्दोलित शिक्षकले गुनासो गरेका छन् ।
हरिपूर्वा नगरपालिका–५ मा रहेको केश्वर गरिब जनता माध्यमिक विद्यालयका प्रधानाध्यापक सरोजकुमार यादवले शिक्षकले तलब नपाएसम्म नियमित पठनपाठनमा नफर्किने बताउनुभयो ।
प्रतिक्रिया